AGPI - Asociación Galega de Profesionais da Ilustración

caverna
Andrea López

Buscador de Ilustradores

Listado de ilustradores

Noticias

Chega o Autobán 2016!

11/08/2016



Xa queda moi pouquiño para o Autobán!
Autobán é o minifestival de autoedición de Coruña, que este ano celebrarase en Nave 1839 desde a tarde do venres 12 de agosto á noite do sábado 13.

Venres 12
> O venres comeza co BRILÉ BRUTAL, un mundialillo do popular xogo, entre os participantes no Autobán e aqueles que queiran apuntarse (enviando correo a autoban.bd@gmail.com).

> A continuación AUTOCINE e AUTOBOMBO, actividades que irán intercaladas. O AUTOCINE será unha sesión de curtos de animación na que contamos con "Viaxe a pés" (2015) de Khris Cembe, "Astigmatismo" de Nicolai Troshinsky e Decorado (2016) de Alberto Vázquez, que fará unha presentación do seu curto.
O AUTOBOMBO son unha serie de presentacións rápidas a cargo de diversos participantes no Autobán, en formato 15x15 (15 imaxes por presentación, 15 segundos por imaxe).

Sábado 13
> O sábado comezase o MERCADILLO DE FANZINES ás 12:00, que se prolongará ata as 21:30.

> Ás 13 H. se celebra o MINIBÁN, unha actividade para todos os públicos, e especialmente para a chavalada. Consistirá nesta ocasión en tres microconciertos de bandas locais adaptados especialmente para público infantil.

> A partir das 14 H. haberá SESIÓN VERMÚ, DUELO DE DJs e COMIDA ECONÓMICA. Podedes comer no Autobán e gozar de boa música nun duelo épico de Miss Gozamales VS Beaal.
> Ás 17 H. PRESENTACIÓN de Guía Ninja de AGPI, a cargo de Alberto Guitián.
> Ás 18 H. MESA REDONDA Non nos mires, úneche!: Cultura alternativa e autogestión, con Sara Roca (Nave 1839), Miguel Porto (Bosquexo), Tonecho Otero (Freakemacine), Bernal Prieto (Autobán), moderados por Sira González.
> Ás 20 H. COMITÉ DE SABIOS Reunión no cume: revista de actualidade sobre BD con Emma Ríos (autora de cómics), Simón Branco (libreiro do Sindicato do Cómic), Señor B (crítico en Metrópoles Delirantes). Modera Óscar Iglesias.
> A partir das 22:30 comezará o COMBATE DE DEBUXANTES

>> Todas as actividades son gratuítas e de entrada libre.
>> Podedes consultar a programación completa do Autobán 2016 nesta ligazón

Presentación da edición impresa da Guía Ninja do Ilustrador

09/08/2016



Convidámoste a asistir á presentación da edición impresa da Guía Ninja do Ilustrador, realizada pola AGPI. Unha
ferramenta de sensibilización sobre boas prácticas na profesión que xorde para reflexionar e concienciar sobre condutas abusivas, ofrecer ferramentas útiles e dar orientación legal aos profesionais creativos.

Será este mércores 10 de agosto ás 12.00 no Kiosko Alfonso. A partir dese momento o manual de supervivencia profesional estará tamén na web
www.guianinjadoilustrador.org listo para a súa descarga en formato PDF, tanto en galego como en castelán. 
No acto estarán presentes
Sergio Covelo, presidente da AGPI, Manel Cráneo, ilustrador e colaborador da Guía Ninja do Ilustrador, e Alberto Guitián, ilustrador e coordinador xeral do Proxecto Ninja.

Anímate a vir e leva un exemplar da guía!

E se queres, podes participar coa túa opinión e os teus comentarios a través das nosas redes sociais.

E non o esquezas... Be Ninja, my friend!

Viñetas desde o Atlántico 2016

08/08/2016


Nova edición do Salón Internacional do Cómic Viñetas desde o Atlántico, do 8 ó 14 de agosto en A Coruña.

Nunha postura analítica e crítica sitúanse varios dos autores invitados: Cristina Bueno, que aborda a realidade dos desfiuzamentos en Aquí vivió: historia de un desahucio; Nadar, coa súa novela autobiográfica El mundo a sus pies, sobre as vivencias dun parado; Jorge González, que tratou en varias ocasións os efectos sociais das ditaduras iberoamericanas do XX; ou o guionista Juan Díaz Canales, con Como viaja el agua.

Os afeccionados ás historias do universo da Patrulla X poderán gozar da presenza dun dos alma máter destes personaxes, Chris Claremont, responsable de rexir os destinos de Cíclope, Lobezno,Tormenta, Mística e Magneto durante os dezaséis anos mais fecundos desta tropa.

Poderemos ver os orixinais de Bajo el sol de Medianoche, do Corto Maltés, de Rubén Pellejero e Juan Díaz Canales, unha obra respetuosa cos lectores e coa memoria de Hugo Pratt, creador da personaxe. Canales, expoñerá a súa primeira obra como guionista e debuxante, Como viaja el agua, protagonizada por dous anciáns marxinados. Entre os convidados está Jorge González, Premio Internacional de Novela Gráfica Fnac-Sins Entido con Fueye, autor de Las gaviotas son felices, e de Hate Jazz en colaboración con Horacio Antuna. Tamén estará Daniel Torres, mostrando o proceso creativo da súa obra La Casa, na que fai un percorrido pola Historia da Humanidade a través das súas vivendas.

Un dos creadores galegos invitados é Ramón Marcos, nome destacado en Opiumou Galimatías, e debuxante de obras como Vida de nai ou Operación mascota, dentro da serie Silvana, a filla do explorador.

A Sala de Exposicións Salvador de Madariaga, acollerá os orixinais dos Premios Castelao de Banda Deseñada dos anos 2014 e 2015: O inferno do debuxante de Kiko DaSilva e A carreta do diaño de Fernando Llorente. E na Torre de Hércules podedes visitar a exposición Viñetas na Torre: 19 carteis das edicións de Viñetas desde o Atlántico.

Miguelanxo Prado e David Rubín rinden homenaxe a Miguel de Cervantes na exposición Miguel de Cervantes/ El retablo de las Maravillas, conmemorativa do IV Centenario de la Muerte de Cervantes, na Sala de Exposicións do Palacio Municipal de María Pita.

Na exposición “A voz do vento”, no Centro Ágora, Jano ilustra poemas de Manuel María.

A imaxe do Viñetas 2016 é una creación do debuxante Keko. Xunto co cartel, hai outros dous elementos esenciais de Viñetas desde o Atlántico: a gran familia de personaxes que tomarán estes días as rúas e a feira da historieta. As casetas coas últimas novidades editoriais, tomarán o Paseo das Palmeiras transformándoo na Rúa da BD cun amplo programa de obradoiros, entretemento e encontros comerciais cos autores. Alí poderedes atopar a caseta da Agpi, con información, láminas e fanzines dos socios, ademáis de ser punto de venta e recollida da Guía Ninja para ilustradores.

Comunicado en relación á situación do CGAI

12/07/2016


Nos últimos meses estamos vendo como o Centro Galego de Artes da Imaxe (CGAI) está sufrindo unha perda de recursos e persoal que pon en grave perigo o seu funcionamento. Tememos que esto sexa un paso máis dun desmantelamento paulatino desta institución. Nos últimos días o despido dun dos dous proxeccionistas foi a gota que colmou o vaso nesta situación de deterioro.

Colectivos profesionais do sector audiovisual e cultural están a reclamar melloras na dotación do Centro, considerando que é unha institución que debe ser preservada e mellorada para que siga coa súa función de conservación e arquivo da memoria audiovisual de Galicia.

O CGAI é unha institución imprescindible para Galicia e a nosa cultura. Dende a AGPI consideramos que esta situación tamén nos toca coma colectivo de creadores e queremos expresar a nosa disconformidade co abandono da filmoteca de Galicia por parte dos órganos de goberno.

Por iso, animámosvos a participar este mércores día 13 ás 20:00h na xuntanza convocada enfronte do CGAI (R/ Durán Loriga 10, A Coruña) para protestar por este desmantelamento encuberto.

Javier Sáez Castán, Premio Nacional de Ilustración 2016

06/07/2016

Javier Sáez Castán foi galardoado onte co Premio Nacional de Ilustración correspondente a 2016. Outorgado polo Ministerio de Educación, Cultura e Deporte co obxectivo de «recoñecer e distinguir o conxunto do labor realizado por un ilustrador español no ámbito do libro e das letras españolas», está dotado con 20.000 euros. O xurado escolleu a Sáez Castán «pola súa creatividade e talento narrativo que implica a dimensión obxectual do libro; pola súa capacidade para construír mundos e contaxialos; pola calidade das súas obras, moitas das cales son grandes clásicos contemporáneos de dimensión internacional, e pola súa xenerosidade como formador».

Castán
(Huesca, 1964) é ilustrador e escritor especializado en libros para nenos. Iniciou a súa carreira no campo da publicidade e traballando como ilustrador para institucións como a Universidade e o Concello de Alacante e empresas de publicidade. As súas obras teñen recibido numerosos premios e distincións, entre os que destacan o de Mellor Libro Ilustrado na Feira Internacional do Libro Infantil e Xuvenil de México en 2004 e o de Mellor Libro do Ano do Banco del Libro de Venezuela en 2005 pola súa obra Animalario universal del profesor Revillod.

O xurado, presidido por José Pascual Marco, director xeral de Política e Industrias Culturais e do Libro, estivo composto por Mónica Fernández, subdirectora xeral de Promoción do Libro, a Lectura e as Letras Españolas; Carmen Marcos, designada por APIC; Aitana Carrasco, por APIV; María Pascual de la Torre, por APIM; Jacobo Fernández Serrano, por AGPI; Ana González Lartitegui, por Euskal Irudigileak; Iratxe López de Munain, por FADIP; Antonio Seijas, pola OEPLI; Estrella de Diego, pola Real Academia de Bellas Artes de San Fernando; María del Rocío Martínez, polo Centro de Estudios de Género da UNED; Rafa Vivas, polo Ministro de Educación, Cultura e Deporte; e a galardoada na pasada edición, Elena Odriozola.

DECÁLOGO NINJA: #10 Infórmate, asóciate

15/06/2016



Chegamos ao final do decálogo da Guía Ninja do Ilustrador, e facémolo cunha reflexión sobre a importancia da información e da unión de profesionais da ilustración como ferramentas indispensables. Contámosche que unha das mellores formas de acceder a elas é a través das asociacións, e che damos algunha pista sobre as súas tarefas e o seu funcionamento. O artigo, naturalmente, vén ilustrado cunha viñeta, neste caso do noso socio Uxío Broullón (Ictioscopio).

Pero isto non queda aquí. Estamos a preparar unha versión en PDF do decálogo completo, que estará dispoñible proximamente na web www.guianinjadoilustrador.org tanto en galego como en castelán. Manterémoste ao tanto. E recorda... Be Ninja!

Decálogo Ninja: #9 Os papeis do ilustrador

08/06/2016

Como todo profesional freelance que desenvolve a súa actividade en España, o ilustrador debe asumir unhas condicións burocráticas, fiscais e de cobertura sanitaria bastante áridas e incómodas. Neste post resumimos estas condicións e deixamos algunhas recomendacións para que levar os papelames non se che converta nun viacrucis.

Este é o punto número nove do Decálogo, xa non queda nada para que o decálogo este completo! Lembrade que podedes consultar todos os artigos na Guía Ninja do ilustrador !!
#BeNinja!

Nace a ‘Guía Ninja do Ilustrador’

13/04/2016


Ilustración de José Domingo

A maioría dos ilustradores e ilustradoras son profesionais freelance, polo que, á parte de crear, teñen que manexar plans de empresa, negociar proxectos e facer presupostos, contratos e facturas. O ilustrador debe coñecer a fondo os dereitos e deberes da súa creación artística, para protexela e poder explotala. E, ademais, ten que moverse nun mercado complexo e protexerse de prácticas abusivas. Os ilustradores freelance precisan adestramento e habilidades ninja!

Ante esta esixencia profesional, desde AGPI consideramos indispensable a elaboración dunha guía que subministrase as ferramentas necesarias para defender os nosos dereitos e a nosa profesión. Así nace a Guía Ninja do ilustrador, un manual de boas prácticas, con información actualizada e moi valiosa que recolle e resume todo o que desde hai anos veñen divulgando as asociacións profesionais.

A partir de hoxe, e con cadencia semanal, publicaremos unha viñeta e un artigo en guianinjadoilustrador.org, conformando así un decálogo da profesión que pode ser divulgado facilmente a través das redes sociais e que permite o acceso rápido a informacións máis amplas sobre dereitos e cuestións prácticas da profesión.

Comeza a Feira de Boloña con presencia da ilustración galega

03/04/2016

Desde o 4 ó 7 de abril ten lugar a Fiera del Libro per Ragazzi, feira de gran importancia para o mundo da ilustración, especialmente a ligada á literatura infantil e xuvenil, na cidade italiana de Boloña.

Novamente, o posto oficial promovido pola Xunta de Galicia dedica un espazo á ilustración, en colaboración coa AGPI. Nesa parte do stand está a proxectarase continuamente un bucle de imaxes de ilustradores da AGPI e hai acceso a exemplares do noso último catálogo, "Novas olladas sobre os clásicos universais". Expóñense exemplares de libros ilustrados por socios nosos no último ano, ademáis dunha exposición con ilustracións de varios dos socios: Alberto Guitián, Alberto García Ariza, Almudena Aparicio, Andrés Meixide, Carlos Rodil, Flavia Lago, José Gimeno, Iria Fafián, Iván Mourente, Javi Montes, Julia Gema, Kristina Sabaite, María Elisabeth, Marina Seoane, Marta Álvarez, Minia Regos, Nuria Díaz, Paula Mayor, Pedro Díaz, Perrilla Gatirrosa, Pinturero, Rodrigo Chao, Victoria Riveiro e Yupiyeyo.

Ademáis, contamos coa presencia das nosas socias Almudena Aparicio e Nuria Díaz, que impartirán obradoiros e dibuxarán en directo durante estes días.

Resultados da enquisa de ilustración

11/03/2016

A APIM (Asociación Profesional de Ilustradores de Madrid) acaba de publicar o resultado da enquisa «Ud. está aquí», un estudo sobre a situación dos profesionais da ilustración en España. Esta enquisa difundiuse polas redes sociais e contou coa colaboración das asociacións de ilustradores españolas, nas que se inclúe AGPI.

Foron 450 persoas as que participaron na enquisa, polo que desde APIM piden prudencia para interpretar os datos resultantes, xa que non se refiren ao total dos ilustradores españois, senón aos que realizaron a enquisa.

Neste enlace podedes ver os resultados.