AGPI - Asociación Galega de Profesionais da Ilustración

London
Antonio Seijas

Buscador de Ilustradores

Listado de ilustradores

Noticias

Ilustradores/as seleccionados para a Bienal de Bratislava

07/03/2017

A Bienal de Bratislava é unha prestixiosa exposición internacional de ilustracións de libros para nenos e novos, organizada polo Ministerio de Cultura eslovaco, a Comisión Eslovaca da UNESCO e a Casa Internacional da arte para Nenos, que se celebra durante os meses de setembro e outubro. Ademais da mostra de orixinais, realízase un simposio internacional de especialistas en ilustración de libros para nenos e novos.

A OEPLI, como sección española de IBBY  selecciona, xunto coas súas catro seccións territoriais, a 15 ilustradores/as con 24  libros recente publicación. Entre a selección deste ano se atopan algúns dos nosos socio/as:  Aitziber Alonso, Albert Asensio, Roger Olmos, Leire Salaberria, Ignasi Blanch, Marina Seoane, Miguel Cerro, Xosé Cobas, Jokin Mitxelena, Pep Montserrat, Maite Gurrutxaga, Minia Regos, Xan López Domínguez, MaGuma e Eider Eibar.

Comunicado sobre o cartel do Entroido da Coruña

15/02/2017

No día de onte, o arcebispado de Santiago de Compostela sumouse nun comunicado ás críticas emitidas pola asociación Abogados Cristianos a respecto dun dos carteis que, con motivo do Entroido na cidade da Coruña de este ano, realizou o ilustrador Alberto Guitián. A serie de carteis, que consta de catro modelos diferentes que reflicten diversos disfraces típicos destas festas, inclúe un en que o disfrace é de tipo eclesiástico, e isto foi considerado polas institucións antes referidas como «burla das crenzas» de moitos cidadáns. Varios políticos do Partido Popular fixeron declaracións criticando o cartel no mesmo sentido.

Ante esta situación, a Asociación Galega de Profesionais da Ilustración quere manifestar o seu total apoio a Alberto Guitián, e defender o seu traballo. A súa serie de carteis —de calidade artística superior, por outro lado— en ningún caso busca burlarse das crenzas de ninguén, senón reflectir o espírito da festa do Entroido, que tivo sempre como un dos seus puntos claves a visión humorística e a chanza acerca das institucións e as xerarquías: reis, políticos, banqueiros e membros da comunidade eclesiástica son sempre parte dese imaxinario popular que sae a relucir nestes días. Tanto é así que na serie de carteis do ano pasado para o Concello da Coruña, asinada polo ilustrador David Pintor, entre as nove variantes de disfrace do personaxe que servía de “leitmotiv” estaban o de garda civil e o de cura, sen que isto chegase a estrañar a ninguén.

A Asociación Galega de Profesionais da Ilustración defende e defenderá sempre a liberdade de expresión, máxime cando, coma neste caso, non se pode achacar ao autor ningunha intención lesiva cara a ningunha crenza ou confesión.


Actualización (17/2/2017): A FADIP (Federación de Asociaciones de Ilustradores Profesionales) publicou tamén un manifesto sobre este asunto, que pode lerse na súa web.

Preséntase o Día da Ilustración 2017

25/01/2017


Cartel do Día da Ilustración 2017, a cargo de Perrilla


O Día da Ilustración 2017 presentouse esta mañá en Santiago de Compostela. O Día da Ilustración foi instituído pola Xunta de Galicia hai catro anos, como parte do seu Calendario do libro e da lectura, tomando a data do 30 de xaneiro, día de nacemento de Alfonso D. R. Castelao.

Este ano, por iniciativa da AGPI —que vén colaborando coa celebración desde o primeiro ano con pequenas actividades—, o Día da Ilustración vese reforzado coa homenaxe a un dos grandes ilustradores galegos históricos, Álvaro Cebreiro (A Coruña, 1903-1956), coa intención de que, ano tras ano, unha figura destacada da ilustración en Galicia reciba un merecido tributo para revalorizar a súa contribución á nosa cultura e á nosa sociedade.

Nesta ocasión, para celebrar o evento, a Biblioteca e Arquivo de Galicia organiza unha exposición, Cebreiro: o trazo da vangarda, centrada na súa obra. A mostra poderá visitarse ata o próximo 7 de marzo. Pola súa parte, a AGPI produciu, coa colaboración da Subdirección Xeral de Bibliotecas, un pequeno vídeo para a difusión da súa vida e obra en internet, especialmente nas redes sociais:


Vídeo ‘Cebreiro – Día da Ilustración 2017’, con guión de Alberto Guitián, imaxe de Isabel Vila e música de Roberto Casteleiro

O cartel da edición deste ano está a cargo da ilustradora Perrilla. No programa, que pode descargase desde esta ligazón, encontramos diversas actividades desenvolvidas nas bibliotecas galegas; entre elas, obradoiros de cómic e ilustración, a cargo de Iago García, María Sánchez Lires, Perrila, Noemí López e David Buceta, un curso titulado «Grandes ilustradores da historia», e exposicións bibliográficas e de ilustracións.

[Nota de prensa sobre a presentación na web de Cultura.]

Presentación oficial da curtametraxe DECORADO, de Alberto Vázquez

21/01/2017

Presentación oficial na Coruña da curtametraxe "DECORADO" do noso socio Alberto Vázquez.

Tras o seu paso por festivais como Cannes, Annecy ou Toronto cultivou máis de 20 premios internacionais e o 4 de Febreiro competirá nos premios Goya como mellor curtametraxe de animación.

Ademais falaranse de proxectos en marcha como a nova longametraxe de Alberto, "Unicorn Wars" e outras sorpresas. Nesta especial presentación contaremos coa presenza de Alberto Vázquez e da produtora Chelo Loureiro, así como a de xente do equipo como o músico Victor García ou os artistas Martín Romeu e Giovanna Lopalco.

:: Sábado, 22 de Febreiro ás 17:30 h. no edificio da Domus (Rúa Ángel Rebollo, 91 - A Coruña)

Allariz Ilustrado: I Festival da Arte da Ilustración

18/01/2017

Primeira edición do Festival da Arte da Ilustración, ALLARIZ DEBUXADO, que será do 27 de xaneiro ó 28 de xaneiro no Salón de Actos do Fogar dos Maiores (Rúa Campo da Barreira - Allariz)

:: Venres, 27 de xaneiro:
>12.00 h. Presentación das xornadas
>12.15 h. DEBUXANDO ALLARIZ. Charla sobre cadernismo, a cargo de Isabell Seidel, cadernista. A continuación, obradoiro sobre cadernismo nas rúas e rutas de Allariz. Haberá unha interrupción para o xantar, e unha reunión final ás 18 h. para facer un balance do traballo realizado. As persoas que asistan ao obradoiro deberán traer o material de traballo oportuno (acuarela, rotuladores, papel ou caderno)

>19.00 h. ALLARIZ ILUSTRADO COMO IMAXE DE MARCA. Charla-coloquio a cargo de Miguel Robledo, ilustrador e historietista

>22.00 h. MICROPRESENTACIÓNS ILUSTRADAS. Oportunidade para afeccionados e profesionais para coñecerse e intercambiar proxectos, universos e ideas.

:: Sábado, 28 de xaneiro:
>10.30 h. FRASES ENCONTRADAS. Charla-obradoiro, a cargo de Juan Berrio, Ilustrador e historietista, Premio Fnac de novela gráfica 2012.
>17.00 h. EL ANIMALARIO VERTICAL: EL REGRESO DEL PROFESOR REVILLOD. Charla coloquio a cargo de Javier Sáez Castán, ilustrador Premio Nacional español de Ilustración 2016.

:: Durante todo o festival estará aberta a exposición CLÁSICOS RESETEADOS, por Miguel Robledo.
Na Galería Circular (Rúa das Lobariñas, 9).
* Todas as actividades son gratuítas e de libre asistencia.
+info e inscripcións en >> info@airadasletras.gal e airadasletras.gal.

Charla Ninja na Facultade de Belas Artes de Pontevedra

21/11/2016

Terceira e última charla ninja deste outono: mércores 23 de novembro en Pontevedra, na Facultade de Belas Artes (R/ Maestranza, 2) ás 12:30 h, cos senseis Nuria Díaz e Guitián. Entrada libre e de balde.

Rematamos o ciclo de charlas ninja en centros de ensino neste 2016.

En decembro voltaremos a Pontevedra para presentar a Guía Ninja no Culturgal (Feira Galega das Industrias culturais).

Charla Ninja en Ourense

02/11/2016

Continúa o ciclo de charlas ninja que AGPI organiza este outono nas tres escolas de arte galegas que imparten formación en ilustración.

Próxima CHARLA NINJA: venres 4 de novembro en Ourense na Escola de Arte Antonio Faílde (Avda. da Universidade, nº 18) ás 12:00 h, cos senseis Fran Bueno e Guitián.

Pablo Auladell, Premio Nacional do Cómic 2016

27/10/2016

 Pablo Auladell foi galardoado hoxe co Premio Nacional do Cómic 2016 pola súa obra El paraíso perdido. O xurado escolleu esta obra, inspirada no poema homónimo de John Milton, por «o gran valor artístico e a forza visual inspirada pola intemporal visión de Milton, o seu tratamento da cor, o uso orixinal da iconografía e a narrativa, que consegue ao mesmo tempo ser arquetípica e plenamente actual». O premio, concedido polo Ministerio de Educación, Cultura e Deporte, está dotado con 20.000 euros e ten como obxecto «distinguir a mellor obra desta especialidade publicada en calquera das linguas do Estado durante o ano 2015».

Pablo Auladell (Alacante, 1972) é docente do Master Ars in Fabula e da AIF Summer School en Macerata (Italia). Ten ilustrado máis de trinta álbums, novelas e cómics, e a súa obra ten sido exposta en galerías e feiras de Madrid, Barcelona, Roma, Boloña e Xenebra. Co seu primeiro álbum de BD, El camino del titiritero, foi finalista na categoría de Autor revelación no Salón de Barcelona de 2002. En 2006 obtivo ese mesmo premio por La Torre Blanca (2005). Tamén foi recoñecido co premio do Ministerio de Cultura ás Mellores Ilustracións de Libros Infantís e Xuvenís en 2005 por Peiter, Peter y Peer y otros cuentos, de Hans Christian Andersen.

O xurado, presidido polo director xeral de Política e Industrias Culturais e do Libro, José Pascual Marco, e coa subdirectora xeral de Promoción do Libro, Mónica Fernández, como vicepresidenta, estivo composto por Juan Díaz Canales, un dos autores galardoados en 2014; Ulises Ponce, designado pola AACE; Mamen Moreu, pola Federación de Asociaciones de Ilustradores Profesionales (FADIP) —á que pertence á AGPI—; Eva Cosculluela, pola CEGAL; Anna Abella, pola Asociación de Críticos y Divulgadores de Cómic; Juan Bordes, pola Real Academia de Bellas Artes de San Fernando; Elisa MacCausland, pola FAPE; María Soledad Sánchez, polo Instituto de Investigaciones Feministas de la Universidad Complutense de Madrid; e Gerardo Vilches, polo ministro de Educación, Cultura e Deporte.

Chega o XIII ENCONTRO GALEGO DE ILUSTRACIÓN!

19/10/2016

.
Temos todo preparado para a
XIII edición do Encontro Galego de Ilustración, que decorrerá baixo a organización de AGPI, o próximo sábado 29 de outubro, no auditorio do CGAC - Centro Galego de Arte Contemporánea ( Valle Inclán, 2 - Santiago de Compostela )

Este ano o Encontro acolle dúas interesantes charlas no CGAC: de BambinoMonkeyXosé Vizoso.

:: 11:20 BAMBINOMONKEY [Animación/Publicidade]
Ignacio Maroto, experto en deseño de personaxes, falará da súa traxectoria e traballo, cunha breve sesión de pintura dixital en directo.

:: 13:00 XOSÉ VIZOSO [Produto/Cartel/Editorial]
A través dun coloquio co autor faremos un percorrido polo seu traballo como deseñador en Sargadelos, cartelista e ilustrador.

Sábado 29 de outubro a partir das 11:00 h.
Auditorio do CGAC- R/ Valle Inclán, 2
Santiago de Compostela

:: Podedes descargar o programa completo aquí ::

#Encontro2016

MINIA REGOS, creadora do cartel para as Bibliotecas escolares de 2016/2017

14/10/2016

"Biblioteca escolar - Territorio das Artes" é o lema escollido para os materiais que a Consellería de Cultura, Educación e Ordenación Universitaria edita a comezo do curso 2016/2017  con destino ás bibliotecas escolares dos centros educativos galegos. Nesta ocasión foi a nosa socia Minia Regos a creadora convidada a interpretar o lema anual.

A imaxe creada por Minia Regos garda moitas sorpresas para as lectoras e os lectores; propón un xogo de exploración e aventura por este "territorio" complexo e engaiolante que é toda biblioteca escolar.

Nos últimos anos, as bibliotecas escolares demostraron que é posible integrar as ciencias e as humanidades nas actividades de lectura e de acceso e construción do coñecemento. Os materiais de divulgación científica, os xogos matemáticos, a xeografía ou as aventuras da exploración física ou simbólica foron temática de traballo e son xa parte esencial das programacións e dos proxectos coordinados desde as bibliotecas. Cómpre agora facer visible esa parte do coñecemento humano que conecta directamente coa creatividade: as Artes todas teñen cabida na biblioteca escolar e así o demostran as múltiples actividades programadas anualmente con está temática.