Terceira sesión de debuxo de modelo no Clube de Debuxo

Despois da pausa estival, volve o Clube de Debuxo, e faino novamente en forma de sesión de debuxo con modelo en vivo na Fundación Luis Seoane (rúa San Francisco, 27, 15001 A Coruña) este venres, 20 de setembro, de 19:00 a 21:00. 

Como nas anteriores sesións, co obxecto de realizar un debuxo áxil, as poses do modelo serán curtas, de entre un e dez minutos, e, malia que haberá cadeiras para quen queira, o recomendable será moverse pola sala. Cada asistente, como é habitual, debe levar o seu propio material.

As actividades do Clube de Debuxo están dirixidas a ilustradores, animadores, debuxantes de cómic e estudantes de ilustración. No caso dos socios da AGPI, a actividade é gratuíta, pero aos non socios nesta ocasión pediráselles un donativo de 2 euros (na propia sala), para cubrir o pagamento do modelo. Para realizar a inscrición, só hai que cubrir este formulario en liña: https://bit.ly/2lZi6H0. O prazo de inscrición remata o 19 de setembro. O aforo é limitado, e as prazas serán adxudicadas por rigorosa orde de inscrición.

Esta quinta sesión dá así continuidade ás outras dúas con modelo realizadas na mesma Fundación Luis Seoane, e mais ás realizadas anteriormente nun ensaio da Sinfónica de Galicia e na piscina municipal do Club do Mar da Coruña.

O Clube de Debuxo naceu coa intención de realizar unha práctica interesante rodeados de compañeiros, ademais de crear un punto de encontro entre profesionais onde compartir as nosas experiencias e inquedanzas. De momento todas as sesións foron situadas na cidade da Coruña, mais a intención é abrir o abano de localizacións proximamente a outras zonas da comunidade galega.

Compartir