Encontro Galego de Ilustración

Desde 2004 AGPI organiza este encontro en Santiago de Compostela o último sábado de outubro. Esta cita anual —de referencia para os profesionais do sector en Galicia— acolle charlas de destacados profesionais da ilustración (abertas a todo o público), un xantar para os socios e a asemblea xeral anual de AGPI.

Feiras internacionais

AGPI representa a Galicia nas feiras internacionais do libro de Boloña, Frankfurt e Guadalajara, difundindo as obras dos seus socios, establecendo contactos con editoriais e realizando actividades lúdicas co fin de atraer o maior público posible.

Agpi no Festival Viñetas

Dentro da feira do cómic do Festival Viñetas desde o Atlántico da Coruña, AGPI conta cun posto onde toda persoa interesada pode informarse das nosas actividades, atopar as nosas publicacións e catálogos ou mercar obra dos nosos socios.

Día da Ilustración

En colaboración coa Xunta de Galicia desenvolvemos o Día da Ilustración, que ten lugar o 30 de xaneiro, aniversario do nacemento de Castelao. Nesta data recuperase a figura dun ilustrador galego histórico para darlle difusión ao seu traballo.

Ilustranoites

Micropresentacións de ilustración en bares ou espazos culturais, onde os creadores presentan os seus proxectos nun ambiente cordial e desenfadado.

Debate sobre o Estado da Ilustración (DEI)

AGPI vén organizando o DEI en diversas cidades de Galicia. Nel socios e convidados debaten sobre o presente e o futuro da ilustración: os retos, as problemáticas, as novas tendencias etc.

Revisión de portafolios

En eventos como o Viñetas ou o Salón do Libro Infantil e Xuvenil de Pontevedra, AGPI ofreceu sesións gratuítas de revisión de portafolios, nas que profesionais acreditados asesoran a estudantes e ilustradores noveis.

Obradoiros e talleres

Photoshop, pintura dixital, entintado tradicional e dixital, márketing e redes sociais… son algúns dos talleres que temos ofrecido a socios e non socios a prezos accesibles.