Descargar o programa en PDF (952 KB)

Programación

 

Venres 27 de setembro

Unitaria | Calzada de San Pedro, s/n, 15703 Santiago de Compostela
16:00 Obradoiro de ilustración con Javirroyo «Mapas ilustrados para amosar o mundo da túa cabeza»

Prazas limitadas. Inscrición: 15 euros (para socios da AGPI: 5 euros)

Inscricións ata esgotar as prazas. Accede aquí ao formulario de inscrición.

 

Sábado 28 de setembro

Auditorio de Galicia – Sala Mozart | Av. do Burgo das Nacións, s/n, 15704 Santiago de Compostela

Entrada libre e gratuíta

Xornada presentada por Neves Rodríguez

 

Mañá

10:45 Presentación
11:00 Charla Jon Juárez (Harriorrihar): «Debuxar coma un robot, pensar coma un humano. Nesa orde»
12:15 Pausa café
12:45 Charla con Inês Silva: «Marketing e venda do traballo creativo no mercado internacional»

 

Tarde

16:00 Revisión de portafolios con Inês Silva e Marta Madureira

Con inscrición previa. Accede aquí ao formulario de inscrición. 

17:00 Panel de experiencias + mesa redonda: «Ilustración en Portugal»

Con Marta Madureira, Cátia Vidinhas e Inês Silva.

19:00 Charla con Javirroyo: «A máquina do tempo»

 

Noite

Camalea | Praza de San Martiño, 4, 15704 Santiago de Compostela

Entrada libre e gratuíta

23:00 Festa fin de Encontro: Sesión DJ Ilustrada

Sesión do DJ Pablo Electrocute, con proxección de debuxo en directo a cargo de varios ilustradores.

Máis detalles, a continuación

16 Encontro Galego de Ilustración

Nesta edición número dezaseis, o Encontro trae de novo a Compostela unha escolma da ilustración máis interesante da Península: botamos unha ollada a autores que traballan en lugares tan diferentes como o País Vasco, Portugal ou Cataluña.

O puxante panorama da ilustración do país luso (tan próximo e ao mesmo tempo tan descoñecido en Galicia) terá especial destaque: coñeceremos non só a perspectiva dos seus creadores e creadoras, senón tamén a da prestixiosa axencia portuguesa Illustopia. Este paseo pola escena da ilustración portuguesa forma parte dunha estratexia de achegamento da AGPI á realidade do país veciño, na que xa están en marcha intercambios e colaboracións con iniciativas como o Encontro Internacional de Ilustração de São João da Madeira.

Ademais, un obradoiro con Javirroyo, unha sesión de revisión de portafolios e unha actividade lúdica (a Sesión DJ Ilustrada) completan o programa deste ano. Coma sempre, todas as persoas interesadas na ilustración e a creatividade gráfica estades convidadas a asistir.

Charlas

Sábado 28, entrada libre e gratuíta

Auditorio de Galicia – Sala Mozart | Av. do Burgo das Nacións, s/n, 15704 Santiago de Compostela

11:00

JON JUÁREZ (HARRIORRIHAR): «DEBUXAR COMA UN ROBOT, PENSAR COMA UN HUMANO. NESA ORDE»

Jon Juárez (Pamplona-Iruña, 1983) é dono dun rico universo gráfico onde a liña clara acada tons tan realistas como irreais. Tras estudar animación e modelaxe 3D en Barcelona, publicou un feixe de historias curtas de BD en diferentes revistas nacionais e internacionais, coas que gañou en 2012 o Premio Injuve de Cómic. Ten colaborado con músicos como Ángel Stanich, e traballou en producións audiovisuais como Angry Birds ou Another Day of Life, un documental de animación sobre Kapuscinski, gañador dun Goya e un EFA. En 2018, recibiu a bolsa da Maison des Auteurs de BD de Angoulême. Vén de traballar como creativo coa empresa Alpha, explorando posibilidades tecnolóxicas e deseñando futuros especulativos.

harriorrihar.myportfolio.com

12:45

INÊS SILVA: «MARKETING E VENDA DO TRABALLO CREATIVO NO MERCADO INTERNACIONAL»

Inês Silva (Lisboa, 1973). En 2009 fundou con Carlos Praça a axencia de ilustración Illustopia, que representa máis de 50 artistas portugueses e internacionais. A axencia está centrada desde o inicio na internacionalización dos talentos que representa. Tamén fundou a axencia literaria ByRights Agency, especializada en libros infantís. En 2016 foi comisaria da exposición colectiva Portugal Ilustrado. Na súa charla, falará sobre o funcionamento das axencias de ilustración e as claves para acceder ao mercado internacional.

illustopia.com

19:00

JAVIRROYO: «A MÁQUINA DO TEMPO»

O traballo de Javirroyo (Zaragoza, 1972) é sinónimo de enxeño, frescura e eficacia comunicativa. É o creador da BD La Cebolla Asesina. Ten colaborado en publicacións como El País, Interviú, El Semanal, Visual ou El Virus Mutante e para editoriais como Edelvives ou Santillana. É fundador e editor do blog de humor gráfico elestafador.com. Entre os seus libros destacan Martín Berasategui y David de Jorge (Penguin Random House, 2015), co que obtivo un Premio Junceda de Ilustración; La escuela (Foundawtion, 2017) e Life is Sho (Chispum, 2019). Baixo a marca Chispum comercializa vinilos ilustrados por el mesmo e outros ilustradores de renome. Na charla falará do seu punto de vista acerca de como viviu a ilustración desde que comezou. 

javirroyo.com

Panel de experiencias + mesa redonda

«ILUSTRACIÓN EN PORTUGAL»

Sábado 28, 17:00, entrada libre e gratuíta

Auditorio de Galicia – Sala Mozart | Av. do Burgo das Nacións, s/n, 15704 Santiago de Compostela

Despois do panel de experiencias, a cargo das ilustradoras Marta Madureira e Cátia Vidinhas, mesa redonda sobre o panorama actual da ilustración no país veciño, coas dúas ilustradoras e mais Inês Silva, da axencia Illustopia.

Marta Madureira

Marta Madureira (Porto, 1977) é deseñadora de comunicación, ilustradora e docente. Imparte ilustración na Licenciatura de Deseño Gráfico e no Mestrado de Ilustración e Animación no Politécnico do Cávado e do Ave. Foi distinguida co 1.º premio 3×3 Magazine of Contemporary Illustration en 2012 e seleccionada no catálogo White Ravens en 2016. Conta con máis de 20 libros infantís ilustrados con textos dos máis representativos escritores portugueses. É fundadora, xunto con Adélia Carvalho, da editora Tcharan.

Cátia Vidinhas

Cátia Vidinhas (Portugal, 1989) formouse no Politécnico do Cávado e do Ave e na Facultade de Belas Artes do Porto. Colaborou con diversas axencias de deseño e publicidade e co estudio de animación Bando à Parte. Publicou os álbums Os cavalos de Santiago (2012), Nadav (2012) e Figura de Urso / Haciendo el oso (2015). En 2015 recibiu o Prémio Nacional da Ilustração co libro WonderPorto, e en 2017 o premio Golden Pinwheel Young Illustrators co libro Infâncias.

instagram.com/catiavidinhas

A PRESENTADORA DO ENCONTRO: NEVES RODRÍGUEZ

Actriz e presentadora, ten participado en diversas series de televisión e en obras de teatro como Invisibles (Redrum Teatro, 2018). Obtivo o Premio Mestre Mateo á mellor comunicadora en 2018 polo seu traballo no programa Vaia troula! Entre 2014 e 2018 conduciu o programa radiofónico Metrópoles delirantes, dedicado á banda deseñada. aaag.gal/catalogo/nieves-rodriguez

Obradoiro con Javirroyo:
«Mapas ilustrados para amosar o mundo da túa cabeza»

Venres 27, 16:00-18:00, con inscrición previa

Unitaria | Calzada de San Pedro, s/n, 15703 Santiago de Compostela

Neste obradoiro, Javirroyo amosaranos as posibilidades do debuxo de mapas ilustrados, tanto como ferramenta narrativa como para a transmisión de conceptos. Aprende a sintetizar ideas e comunicalas con ilustracións sinxelas. «Menos é máis cando queres conectar con moita xente á vez».

Prazas limitadas. Inscrición: 15 euros (para socios da AGPI: 5 euros)

Inscricións ata esgotar as prazas. Accede aquí ao formulario de inscrición.

Revisión de portafolios
con Inês Silva e Marta Madureira

Sábado 28, 16:00, con inscrición previa

Auditorio de Galicia – Sala Mozart | Av. do Burgo das Nacións, s/n, 15704 Santiago de Compostela

Sesións de dez minutos por ilustrador. Prazas limitadas. Inscricións gratuítas ata esgotar as prazas. Accede aquí ao formulario de inscrición. 

Festa fin de Encontro: Sesión DJ Ilustrada

Cartel a cargo de Guitián (ver en formato grande)

Sábado 28, 00:00, entrada libre e gratuíta
Camalea | Praza de San Martiño, 4, 15704 Santiago de Compostela

Sesión do DJ Pablo Electrocute, con proxeccións de debuxo en directo a cargo de varios ilustradores.

16 Encontro Galego de Ilustración

Venres 27 e sábado 28 de setembro de 2019

Santiago de Compostela | Auditorio de Galicia + Unitaria

Equipo técnico:
• Dirección: Manel Cráneo
• Secretaría técnica e produción: Alberto Guitián, Henrique Torreiro,
Dani Xove
• Deseño gráfico: Julio Marta (A Casa Ateigada)
• Ilustración do cartel: Jon Juárez (Harriorrihar)

Encontros anteriores: ir á web do 15 Encontro Galego de Ilustración