Texto: Nacho López
Ilustración: Manel Cráneo
As historias paralelas de dous empregados do Correo Imperial, co telón de fondo dunha cidade chamada Capital, rexentada baixo un réxime imperialista, é o punto de arranque de Dámsmitt.
Unha historia repleta de misterio, problemas sociais, revolucións sindicais, conspiración, desaparicións e un asasinato. Un mosaico de personaxes diferentes e definidos.
O álbum que presentarán en Barcelona Kike Benlloch polo guión e Manel Cráneo polos debuxos e deseños, sairá nas vindeiras semanas editado pola editorial madrileña Dibbuks e consta de 64 páxinas en bitono cun apéndice documental sobre un mundo que cabalga entre a ficción paralela á realidade e que fará as delicias dos máis curiosos.
A publicación estará prologada polo americano Jason Lutes, autor da obra internacionalmente coñecida Berlín. É a primeira vez que este autor accede a escribir un prólogo por tratarse de algo contario a súa forma de ver a banda deseñada, pero algo nesta obra que lle chegou dende terras galegas o animou a facelo por primeira vez.
Que segredos esconderá Dámsmitt?
