Ao tempo que deu a coñecer a portada da súa inminente nova novela gráfica, Beowulf —con guión de Santiago García—, o noso socio David Rubín tamén aunciou a súa participación como debuxante dos dous tomos de The Rise of Aurora West, con guión de Paul Pope e J. T. Petty. Trátase dunha precuela da novela gráfica Battling Boy, do propio Paul Pope. Entre os medios que recollen a noticia están Wired e Bleeding Cool, e BoingBoing ofrece ademais unha páxina de adianto. A saída do primeiro dos tomos nos Estados Unidos está prevista para primavera.
David estará ademais no festival Lucca Comics & Games, entre os días 31 de outubro e 3 de novembro, para presentar L’Eroe 2, a versión en italiano do ata este momento o seu último libro publicado.