O noso socio Manel Cráneo é o autor das ilustracións de Vento e chuvia: mitoloxía da antiga Gallaecia, libro de relatos de Manuel Gago, que os define como «a historia dos deuses galaicos, ou sexa, as orixes máis profundas do rico imaxinario da sociedade tradicional galega». O libro, tal e como conta Gago no seu blog, contou cunha gran complicidade por parte de Manel Cráneo, e é resultado dun longo proceso común de «documentación arqueolóxica, viaxes por todo o país» para as localizacións, e debates «interactuando e aprendendo un do outro». Estará á venda nas librarías, editado por Xerais, a partir do 1 de novembro, e a súa presentación será o mércores 30 de outubro, ás 20:30 h, na igrexa da Universidade de Santiago de Compostela, cun espectáculo multimedia baseado na dramatización dalgunhas
das historias do libro a cargo dos actores Kiko Cadaval, Belén Constenla, Soledad Felloza, Anabel Gago e Avelino González,
cun viño galego ao finalizar.
Por outra parte, Demo, o proxecto que desenvolve Manel Cráneo como editor, ten na súa axenda a presentación santiaguesa de Operario, a banda deseñada muda de Jano. Será hoxe, venres 18, ás 18:30 h na Librería Kómic (rúa San Pedro de Mezonzo 34, 15701 Santiago de Compostela).