Nota de prensa dos organizadores:
O próximo luns 23 de abril, Día do Libro, ás 20.00 h., inaugúrase na Biblioteca Pública da Coruña “Miguel González Garcés” a exposición Memoria das paredes: os carteis de Depósito Legal na Biblioteca Pública da Coruña Miguel González Garcés. Presidirá o acto a Conselleira de Cultura e Deporte da Xunta de Galicia, Ánxela Bugallo Rodríguez.
O Depósito Legal constitúe un recurso bibliotecario de primeira orde; no caso da Biblioteca M.G.G. supón o depósito dun exemplar dos materiais impresos de todo tipo realizados na provincia da Coruña; entre eles, os carteis. O obxectivo desta normativa é a conservación do noso patrimonio documental. E ás bibliotecas depositarias, as bibliotecas xestionadas pola Xunta de Galicia, corresponde, ademais de conservalo, organizalo e difundilo.
A difusión é o que persegue “Memoria das paredes”, unha ampla mostra de carteis impresos na provincia da Coruña desde 1958 ata a actualidade. Unha etapa moi ampla na que sucederán procesos históricos importantes, que quedarán reflectidos nos carteis, ademais doutras moitas actividades: festas, espectáculos, deportes, relixiosidad, publicidade comercial e campañas promocionais, política e sindicalismo, congresos, certames, feiras o exposicións. Os acontecementos e obxectos anunciados céntranse fundamentalmente na provincia, aínda que moitas imprentas, como a Roel, serán requiridas en toda Galicia para anunciar os eventos máis importantes. Deseñadores gráficos, ilustradores, fotógrafos, artistas plásticos… son os autores; e entre eles, Luís Seoane e Rafael Barros, que xa contribuíran coas súas sinaturas ao desenvolvemento do cartel galego no primeiro terzo do século XX.